दलहरु आन्तरिक तयारीमा व्यस्त हुँदा प्रदेशसभा बैठक बस्न ढिलाईः उपसभामुख चापागाई
बागमती प्रदेशसभाकी उपसभामुख अप्सरा चापागाईले दलहरु आन्तरिक तयारीमा व्यस्त हुँदा प्रदेशसभा बैठक बस्न नसकेको बताउनुभएको छ ।
प्रदेशसभाको आठौं वार्षिकोत्सवको अवसरमा बुधबार प्रदेशसभा सचिवालयमा आयोजित पत्रकार सम्मेलनमा उहाँले सचिवालयको तयारी पुरा भएपनि दलहरुको आन्तरिक तयार नपुग्दा बैठक बस्न ढिलाई भएको बताउनुभयो ।
उपसभामुख चापागाईले फागुन २१ गते हुने प्रतिनिधिसभा निर्वाचनको प्रक्रिया पनि अगाडि बढिसकेकोले त्यसतर्फ सरकारको काम कारवाही केन्द्रित हुँदा पनि प्रदेशसभा बैठक तुलनात्मक रुपले केही बिलम्ब भएको बताउनुभयो ।
रिक्त रहेको सभामुखको पद पूर्तिको लागि राजनीतिक दलहरुसंग छलफल भइरहेको उहाँले बताउनुभयो ।
नेकपा माओवादी केन्द्र र नेकपा एकीकृत समाजवादी पार्टी बीचको एकता पश्चात् दलहरुबीच छलफल चलिरहेको उहाँले जानकारी दिनुभयो । उपसभामुख चापागाईले हिउँदे अधिवेशन छिटो आह्वान गर्न सचिवालय सरकारसंग निरन्तर छलफलमा रहेको समेत बताउनुभयो ।
उपसभामुख चापगाईले प्रदेशसभा सदस्यहरुको भुमिका कमजोर हुँदा संघीयता प्रति नै वितृष्णा पैदा हुने बताउनुभयो । सही कानुन बनाउन प्रदेशसभा सदस्यहरुले पनि आफ्नो भुमिकालाई प्रभावकारी बनाउनुपर्ने उहाँको भनाई छ । विधेयकहरुलाई विषयगत समितिमा सुक्ष्म ढंगले छलफल चलाउने गरेको उहाँले बताउनुभयो ।
उपसभामुख चापागाईले प्रदेश राजधानी बाहेक अन्य ठाउँमा पनि सरोकारवाला व्यक्ति, विज्ञहरुको उपस्थितिमा पनि विधेयकको बारे छलफल गराउने गरेको पनि उल्लेख गर्नुभयो । विधेयक निर्माणमा प्रदेशसभा सदस्यहरुले पर्याप्त ध्यान दिन नसकेको महसुस सचिवालयलाई पनि भएको उहाँले बताउनुभयो ।
पत्रकार सम्मेलनमा प्रदेशसभाका सचिव रामकुमार पौडेलले हिउँदे अधिवेशनमा बिजनेशको कमी नहुने बताउनुभएको छ । उहाँका अनुसार हाल चिठ्ठा विधेयक र चलचित्र सम्बन्धी विधेयक विचाराधीन अवस्थामा रहेको छ ।
सचिव पौडेलले सचिवालयमा खानेपानी तथा सरसफाई सम्बन्धी विधेयक र आर्थिक कार्यविधि तथा वित्तीय उत्तरदायित्व सम्बन्धी विधेयक दर्ता भएको जानकारी दिनुभयो । वन सम्बन्धी दुई विधेयक पनि सचिवालयमा आउने चरणमा रहेको उहाँले बताउनुभयो ।
पत्रकार सम्मेलनमा सचिवालयका सचिव पूर्णबहादुर दर्जीले प्रदेशसभाले हालसम्म गरेको गतिविधि बारे जानकारी गराउनुभएको थियो । उहाँका अनुसार प्रदेशसभाबाट पारित भएका ९० वटा कानुन मध्ये ८९ वटा कानुन प्रदेश राजपत्रमा प्रकाशित भइसकेको छ ।
गत भदौ २३ र २४ गतेको जेनजी आन्दोलनको क्रममा प्रदेशसभामा ३२ करोड ५४ लाख बराबरको भौतिक क्षति भएको उहाँले जानकारी दिनुभयो । प्रदेशसभा सचिवालय यही माघ १८ गते प्रदेश प्रमुख दिपकप्रसाद देवकोटाको प्रमुख आतिथ्यतामा आठौँ वार्षिकोत्सव मनाउने भएको छ ।
