हेटौंडामा १२ औँ सडक खाना महोत्सव पुस १३ देखि
मकवानपुर होटल एसोसिएसन, हेटौंडाको आयोजनामा १२ औँ सडक खाना महोत्सव यही पुस १३ गतेदेखि सुरु हुने भएको छ ।
“सडकमै जाऔँ, सडकमै खाऔँ, सडकमै रमाऔँ” भन्ने नारासहित आयोजना हुने महोत्सव पुस १६ गतेसम्म चार दिन सञ्चालन हुनेछ ।
महोत्सवको तयारीबारे जानकारी दिन बुधबार आयोजित पत्रकार सम्मेलनमा अध्यक्ष दिलिस गोविन्द जोशीले आन्तरिक तथा बाह्य पर्यटन प्रवद्र्धन गर्ने उद्देश्यले महोत्सव आयोजना गर्न लागिएको बताउनुभयो ।
हुप्रचौरको खेलमैदानदेखि पूर्वतर्फको उत्तर–दक्षिण सडक क्षेत्रमा महोत्सव आयोजना गरिने बताइएको छ । महोत्सवको समुद्घाटन पुस १३ गते अपराह्न ४ बजे संस्कृति तथा पर्यटन मन्त्री सुरेश श्रेष्ठले गर्नुहुने कार्यक्रम तय भएको छ ।
महोत्सवमा पौराणिक संस्कृतिदेखि आधुनिकसम्मका विभिन्न जातीय परिकारहरू एकै स्थानमा पाउन सकिने आयोजकले जनाएको छ । महोत्सवमा करिब ६० वटा स्टल रहनेछन् ।
रैथाने परिकारका १० वटा स्टल निःशुल्क उपलब्ध गराइनेछ भने अन्य स्टलका लागि चार दिनको १० हजार रुपैयाँ शुल्क तोकिएको अध्यक्ष जोशीले जानकारी दिनुभयो । महोत्सव सञ्चालनको अनुमानित लागत खर्च करिब १५ लाख ७२ हजार रुपैयाँ रहेको आयोजकले जनाएको छ ।
महोत्सवबाट ७० देखि ८० लाख रुपैयाँसम्मको कारोबार हुने अपेक्षा गरिएको छ । महोतसवको स्थानीय तथा बाहिरी जिल्लाका साथै सीमावर्ती छिमेकी भारतबाट समेत अवलोकनकर्ताको सहभागिता हुने अनुमान गरिएको छ ।
महोत्सवका लागि हेटौंडा उपमहानगरपालिकाबाट ४ लाख रुपैयाँ र सम्बन्धित मन्त्रालयबाट १ लाख ५० हजार रुपैयाँ प्राप्त हुने जानकारी दिइएको छ । कार्यक्रममा स्थानीय तथा राष्ट्रिय कलाकारहरूको नृत्य, गायन र ब्याण्ड प्रस्तुतिमार्फत दर्शकलाई मनोरञ्जन समेत प्रदान गरिनेछ ।
