कैलाश ४ धुसराङका प्रजा दम्पतीलाई घर हस्तान्तरण
बागमती प्रदेशका मुख्यमन्त्री इन्द्रबहादुर बानियाँले अति विपन्न समुदायका लागि प्रदेश सरकारले एक हजार घर बनाइदिने बताउनु भएको छ ।
आइतबार कैलाश गाँउपालिका ४ धुसराङका एक दम्पतीलाई घर हस्तान्तरण कार्यक्रममा मुख्यमन्त्री बानियाँले कार्यविधि बनाएर गरिब, दलित, सिमान्कृत, चेपाङ लगायत अति विपन्न समुदायको उचित बासस्थानको लागि एक हजार घर बनाउने नीति सरकारले लिएको बताउनुभयो ।
घरसंगै जिविकोपार्जनका लागि स्थानीय तहसंग समन्वय गरि शून्य प्रतिशत ब्याजदरमा दुई लाख रुपैयाँसम्म ऋण उपलब्ध गराउने योजना अघि बढाएको उहाँले बताउनुभयो । मुख्यमन्त्री बानियाँका अनुसार पहिलो चरणमा प्रदेशको १३ जिल्लामा ५०–५० घर बनाएर हस्तान्तरण गरिनेछ ।
मुख्यमन्त्रीको पदभार ग्रहण गरेलगत्तै आफ्नो निर्वाचन क्षेत्रका अति विपन्न परिवारको घर निर्माण गर्ने घोषणा गर्नुभएका मुख्यमन्त्री बानियाँले प्रजा दम्पत्तीको लागि सुरक्षित आवास निर्माण गरी आइतबार हस्तान्तरण गर्नुभएको हो ।
करिब ८ लाख रुपैयाँ लागतमा जस्तापाता र ब्लकको तीन कोठे घर तथा शौचालय निर्माण गरी बिपन्न प्रजा दम्पती लाई हस्तान्तरण गरिएको हो ।
साथै मुख्यमन्त्री बानियाँले सन्तान विहीन प्रजा दम्पतीको जीविकोपार्जनका लागि २० हजार रुपैयाँ नगदसमेत प्रदान गर्नुभएको छ । लालकुमार प्रजा लामो समयदेखि आफ्नै जग्गामा खरको छानो र काठपातले बेरिएको जीर्ण घरमा बस्दै आउनुभएको थियो ।
प्रजा दम्पतीको अवस्थालाई मध्यनजर गर्दै कैलाश गाउँपालिकाले सुरक्षित आवास निर्माणका लागि मुख्यमन्त्री बानियाँसमक्ष सिफारिस गरेको थियो । घर हस्तान्तरण कार्यक्रममा कैलाश गाउँपालिका प्रमुख लोकबहादुर मोक्तानले प्रजा दम्पतीलाई लत्ताकपडा, भाँडाकुँडा लगायत आवश्यक सामग्री समेत सहयोग गर्ने बताउनु भयो ।
यसअघि मनहरी गाउँपालिका–९ ज्यामिरेकी विपन्न दलित महिला मिठुमाया सुनारलाई घर हस्तान्तरण गरिएको थियोे ।मुख्यमन्त्री बानियाँले आफ्नो सेवा–सुविधा वापतको रकमबाट सुरक्षित आवास निर्माण गर्नुभएको हो ।
