मदन भण्डारी राजमार्गको सडक सीमा अतिक्रमण रोक्न बागमती गाउँपालिकालाई सडक डिभिजन कार्यालयको पत्र

मदन भण्डारी राजमार्गको सडक सीमा अतिक्रमणको भएको जनगुनासो बढेपछि सडक डिभिजन कार्यालय, हेटौंडाले बागमती गाउँपालिकालाई पत्र पठाएको छ ।

बुधबार पत्र पठाउँदै सडक सिमा क्षेत्रमा बनेका अवैध संरचना निर्माण तत्काल रोक्न आग्रह गरिएको छ । यसमा समन्वयका लागि जिल्ला प्रशासन कार्यालय, मकवानपुरलाई पनि बोधार्थ पठाइएको छ  ।

सार्वजनिक सडक ऐन, २०३१ को व्यवस्थाअनुसार, केन्द्र रेखाबाट तत्कालीन धरान–चतरा–गाईघाट–कटारी–सिन्धुली–हेटौंडा सडकको दायाँ–बायाँ १५–१५ मिटर सडक सीमा तोकिएको बारे २०७२ चैत्र २९ गतेको राजपत्रमा प्रकाशित गरिएको स्मरण गराउँदै तोकिएको सीमाभित्र निर्माण भएका संरचना रोक्न आग्रह गरिएको छ ।

सडक डिभिजन कार्यालयका प्रमुख गुरुप्रसाद अधिकारीले हस्ताक्षर गरेको पत्रमा अनाधिकृत संरचना निर्माण कार्य रोक्न र सडक सीमा संरक्षणमा सहयोग पु¥याउन बागमती गाउँपालिकालाई आग्रह गरिएको छ ।

नेपाल सरकारले यस सडकलाई राष्ट्रिय राजमार्गको रूपमा स्तरोन्नति र सुधार गरिरहेको छ ।