नापी कार्यालय दशैं विदापछि मात्र सन्चालनमा आउने
भदौ २४ गते जेन–जी आन्दोलनका क्रममा आगजनीबाट क्षतिग्रस्त बनेको नापी कार्यालय दशैं बिदा सकिएपछि मात्र सञ्चालनमा आउने भएको छ ।
आगलागीका कारण कार्यालयका सबै सामग्री पूर्णरूपमा क्षतिग्रस्त भएकाले तत्काल सेवा सुचारु गर्न नसकिने भएको हो । कार्यालयको तल्लो तलामा रहेका नापी प्लट, रजिष्टर फाइल, नक्सा, सेवाग्राहीका निवेदन, तामेल नभएका कागजात, रेखांकनका निवेदन तथा वडा नम्बर २, ३ र १० का नयाँ नापीसम्बन्धी डाटा जलेर नष्ट भएको निमित्त कार्यालय प्रमुख प्रकाश घिमिरेले बताउनुभयो ।
यसैगरी, प्राविधिक फाँटका प्लट रजिष्टर, सकल नक्शा र फाइल नक्सासमेत नष्ट भएको छ । क्षतिको विवरण संकलन तथा मूल्यांकनको कार्य भइरहेको उहाँले बताउनुभयो । यद्यपि, सकल नक्सा ३ सय १९ र फिल्ड बुक ३ सय ६६ थान सुरक्षित रहेको बताइएको छ ।
बैशाख जेठसम्मको डाटा सुरक्षित रहेको छ भने त्यसयताका तीन महिनाको कित्ताकाट गरिएका तर स्क्यान नगरिएका फाइलहरू नष्ट भएका छन् । नेपाल ल्याण्ड इन्फरमेशन प्रणाली मार्फत प्रविष्ट गरिएका डाटा भने सुरक्षित रहेको निमित्त प्रमुख घिमिरेले जानकारी दिनुभयो ।
कार्यालयमा रहेका १५ वटा कम्प्युटर, १७ वटा सिसिटिभी क्यामेरा, १९ वटा प्रिन्टरसहित ३४ प्रकारका दुई सय ३१ थान सामग्री जलेर नष्ट भएको कार्यालयले जनाएको छ । नापी कार्यालय भवनको माथिल्लो तलामा रहेको भूमि समस्या समाधान आयोगका फाइल तथा जिन्सी सामग्री भने आगलागीबाट जोगिएको छ ।
बागमती गाउँपालिकाका लागि तयारी अवस्थामा रहेका १ सय ३ वटा लालपूर्जा पनि सुरक्षित रहेको कार्यालयले जनाएको छ । नापी अधिकृत रामेश्वर राज महतोका अनुसार, तल्लो तलामा रहेका सम्पूर्ण भौतिक संरचना, सवारी साधन तथा कागजात जलेर नष्ट भएका छन् ।
सेवा प्रवाह बन्द हुँदा सेवाग्राहीहरूले आवश्यक सेवा पाउनबाट वञ्चित भएका छन् ।
सेवा लिन आएका नागरिकहरू फर्कनुपरेको छ ।नागरिकलाई आवश्यक पर्ने देशका संरचनाहरु ध्वस्त हुनु दुखद भएको सेवाग्राहीले गुनासो गरेका छन् ।
क्षतिग्रस्त बनेको कार्यालयको सरसफाइमा नापी कार्यालयका कर्मचारीहरू व्यस्त छन् ।
