गौतम बुद्ध अन्तर्राष्ट्रिय क्रिकेट रंगशाला निर्माणका लागि स्रोत सुनिश्चितः बागमती प्रदेश सरकार
बागमती प्रदेश सरकारले चितवनमा निर्माणाधीन गौतम बुद्ध अन्तर्राष्ट्रिय क्रिकेट रंगशाला निर्माणका लागि आवश्यक बजेटको स्रोत सुनिश्चितता गरेको छ ।
मंगलबार बिहान बसेको मन्त्रिपरिषद् बैठकले रंगशाला निर्माणका लागि बजेटको स्रोत सुनिश्चित गर्ने निर्णय गरेको मुख्यमन्त्री शालिकराम जम्कट्टेलले जानकारी दिनुभयो । रंगशाला निर्माणका लागि ५२ करोड ५० लाख रुपैयाँको स्रोत सुनिश्चित भइसकेको उहाँले बताउनुभयो ।
यसअघि कात्तिक २१ ग्ते बागमती प्रदेश सरकार र भरतपुर महानगरपालिकाबीच रंगशाला निर्माणका लागि कुल ७५ करोड रुपैयाँको लागत अनुमानको ७० प्रतिशत प्रदेश सरकारले व्यहोर्ने सम्झौता भएको थियो ।
यसैगरी, मंगलबारको मन्त्रिपरिषद् बैठकले राष्ट्रिय योजना आयोगको माग अनुसार संघीय समपुरक र विशेष अनुदानको लागि १०/१० वटा योजना सिफारिस गर्ने निर्णय गरेको छ । बैठकले अघिल्लो आर्थिक वर्षमा निर्माण कार्य सम्पन्न भएर भुक्तानी हुन बाँकी रहेका योजनाहरूको भुक्तानी दिने निर्णय गरेको छ । बैठकमा अहिले भौतिक पूर्वाधार विकास मन्त्रालय अन्तर्गतका योजनाको भुक्तानी दिने निर्णय भएको मुख्यमन्त्री जम्कट्टेलले जानकारी दिनुभयो ।
बैठकमा फागुनको दोश्रो साता हिउँदे अधिवेशन बोलाउने तयारी बारे पनि छलफल भएको मुख्यमन्त्री जम्कट्टेलले जानकारी दिनुभयो । उहाँका अनुसार नेपाली कांग्रेसको महासमिति बैठक र नेकपा माओवादी केन्द्रको विधान अधिवेशन रहेकोले फागुनको दोश्रो हप्ता मात्र अधिवेशन बोलाउने बारे छलफल भएको हो ।
यो पनि पढ्नुहोस्
