पूर्वप्रधानमन्त्री बाबुराम भट्टराई स्वास्थ्य उपचारका लागि नयाँ दिल्ली प्रस्थान
पूर्वप्रधानमन्त्री एवं जनता समाजवादी पार्टीका संघीय परिषद अध्यक्ष डा.बाबुराम भट्टराई स्वास्थ्य उपचारका लागि भारतको नयाँ दिल्ली प्रस्थान गर्नुभएको छ । उहाँले सामाजिक सञ्जाल फेसबुकमा तस्विर राख्दै आफू उपचारको लागि दिल्ली जान लागेको जानकारी गराउनुभएको हो । उहाँ लामो समयदेखि पेटमा समस्याले ग्रसित हुनुहुन्छ । उहाँको निदान अस्पताल काठमाडौँकोमा स्वस्थ्य परीक्षण तथा उपचार भइरहेको थियो ।
उहाँलाई न्यूरो–इन्डोक्राइनको ट्युमर भएको आशंका गरिएको छ । चिकित्सकको सल्लाह तथा सिफारिसअनुसार भट्टराईको दिल्लीस्थित ‘इन्स्टिच्युट अफ लिभर एन्ड बिलिअरी साइन्सेस’मा उपचार हुने प्रेस सल्लाहकार विश्वदीप पाण्डेले जानकारी दिनुभयो। भट्टराईको साथमा श्रीमती हिसिला यमी र प्रेस सल्लाहकार पाण्डे दिल्ली गएका छन् ।
