कोरोना अपडेटः नेपालमा एकै दिन १२ सय बढी संक्रमित, १४ जनाको मृत्यु भएको पुष्टि
नेपालमा पछिल्लो २४ घण्टामा थप १२ सय २१ जना कोरोना संक्रमण पुष्टि भएको छ । यो वृद्धिसँगै संक्रमितको सङ्ख्या ३८ हजार५६१ पुगेको स्वास्थ्य तथा जनसङ्ख्या मन्त्रालयले जनाएको छ ।
यस्तै २४ घण्टामा विभिन्न जिल्लामा १४ जनाको मृत्यु भएको मन्त्रालयका प्रवक्ता डा. जागेश्वर गौतमले पत्रकार सम्मेलनमा जानकारी दिनुभयो । यससँगै कोरोनाबाट मृत्यु हुनेको सङ्ख्या २२१ पुगेको छ।
आज काठमाडौंमा सबैभन्दा बढी ३७२ संक्रमित फेला परेका छन् । ललितपुरमा १२ र भक्तपुरमा ४५ जनामा संक्रमण पुष्टि भएको छ। गौतमका अनुसार अहिले देशभरि १७,५१८ जना सक्रिय संक्रमित छन् । ती मध्ये १०,६१२ जना संस्थागत आइसोलेशनमा र बाँकी ६,९०० जना घरमै छन्।
विगत २४ घण्टाको अवधिमा १२,७१७ वटा नमुनाको परीक्षण गरिएको थियो। सो अवधिमा २६७ जना सङ्क्रमणमुक्त देखिएको मन्त्रालयका प्रवक्ता डा। गौतमले जानकारी दिनुभयो । अहिलेसम्म ५४ प्रतिशत सङ्क्रमितहरू निको भइसकेका छन्।
