एक महिनामा बाढि पहिराेबाट १९ जिल्लामा बढि क्षति
वर्षा सुरु भएपछिका एक महिनामा देशले बाढि पहिराेका कारण ठूलो जनधनको क्षति बेहोरिरहेको छ । प्राप्त विवरणअनुसार देशका विभिन्न १९ जिल्लामा बाढी र पहिरोबाट ८८ जनाले ज्यान गुमाएका छन् भने अझै ३२ जना बेपत्ता छन् ।
विस्थापितहरु समेत बढिरहेका छन् । बेपत्ताहरुको खोजी र राहत तथा पुनर्स्थापनाको काम जारी रहेको गृहमन्त्रालयले जनाएको छ ।
सबैभन्दा बढि मानविय क्षति हुने जिल्लाहरुमा म्याग्दी, सिन्धुपाल्चोक, पर्वत, बझाङ, कास्की, जाजरकोट, पाल्पा, लम्जुङ र गुल्मी रहेका छन ।
बाढि पहिराेबाट मानवीय क्षति बेहोर्ने अन्य जिल्लामा झापा, चितवन, सल्यान, कालीकोट, सुर्खेत, गोरखा, स्याङ्जा, बाग्लुङ, डोटी र दार्चुला रहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ ।
सबैभन्दा बढी म्याग्दीमा पहिरोमा परेर २७ जनाले ज्यान गुमाएका छन् भने सिन्धुपाल्चोकमा २० जना हराइरहेका छन् । तराईका विभिन्न जिल्ला भने डुबान र कटानको समस्याबाट प्रभावित भएका छन् । मनसुन सक्रिय भएको दिन जेठ ३१ गते पर्वतको कुश्मा नगरपालिका-३ दुर्लुङमा जंगलमाथिबाट भेलपहिरो खसेर अकल्पनीय रुपमा पहिरो जाँदा नौ जनाले ज्यान गुमाएका थिए ।
असार ८ गते पाल्पाको तानसेन नगरपालिकास्थित सम्मोबारीमा फेरि अर्को विपद्को घटना दोहोरिँदा चार जनाले ज्यान गुमाए । बझाङमा असार २० गते पहिरो खस्दा सात जनाले ज्यान गुमाएका छन् भने एकजना बेपत्ता रहेको छन् । बझाङ र पर्वतको पहिराले कहालिलाग्दो क्षति पुर्याएको छ । त्यसपछि बिहीबार र शुक्रबार मुलुकका विभिन्न स्थानमा पहिरो खस्दा धेरै जनधनको क्षति भएकाे छ ।
