आज कुबेतबाट दुईवटा विमानमा अधिकांश महिला सहित ३०० नेपालीहरु स्वदेश फर्किँदै
कुवेत सरकारकै पहलमा आज स्वदेश फर्किन चाहने नेपाली कामदारहरु लिएर जजिरा एयरलाइन्सका दुई विमानहरु आउने तय भएको छ ।
कोभिड–१९ संकट व्यवस्थापन (सीसीएमसी) अन्तर्गत उडान व्यवस्थापनको जिम्मा पाएको पर्यटन मन्त्रालयका अनुसार बिहीबार बिहान साढे ११ र दिउँसो साढे एक बजे गरी जजिरा एयरलाइन्सका दुई विमान नेपाली लिएर आउने छ ।
बिहीबार आउनेमा अधिकांश घरेलु कामदारका रुपमा कुबेत गएका महिलाहरु रहेको पर्यटन मन्त्रालयले जनायको छ । नेपाल आउने कामदारहरु विमानमा चढ्नु पूर्व स्वास्थ्य परीक्षण हुने र संक्रमणको शंका देखिएकालाई रोकिन सक्छनेछन् । दुई विमानमा १५० का दरले कुल ३०० नेपाली कामदार आउने तय भएको नेपाल नागरिक उड्डयन प्राधिकरणका प्रवक्ता राजकुमार क्षेत्रीले बताएका छन् ।
नेपालीलाई लिएर विमान बुधबार नै आउने तयारी रहेको बताइए पनि व्यवस्थापनको प्रक्रियाले गर्दा एक दिन ढिला भएको जनाइएको छ । नेपाल सरकारले विदेशमा अलपत्र नेपालीलाई स्वदेश ल्याउने निर्णय गरेपछि आफ्नो देशमा अलपत्र नेपाली कामदारलाई कुबेतले आफै पठाउन लागेको हो । कुवेतमा अवैध, श्रम सम्झौता सकिएका र आम माफी पाएका नेपालीको संख्या पाँच देखि ८ हजार रहेको बताइन्छ ।
गएको शुक्रबार एयर अरेबियाले दुबईबाट १६८ नेपाली कामदार लिएर आएको थियो । यस्तै म्यानमारबाट पनि २६ नेपाली आएका थिए ।
