पीसीआर परीक्षण बढाउँदै लकडाउन खुकुलो गर्न संसदीय समितिको निर्देशन
संसदीय समितिले कोरोना भाइरस रोकथाम तथा नियन्त्रणका लागि पीसीआर परीक्षणलाई बढाउँदै लकडाउनलाई क्रमशः खुकुलो पार्न सरकारलाई निर्देशन दिएको छ ।
प्रतिनिधि सभाअन्तर्गतको राज्य व्यवस्था तथा सुशासन समितिको आजको बैठकले कोरोना भाइरसको नियन्त्रणका लागि पीसीआर परीक्षणलाई बढाउन सरकारलाई निर्देशन दिएको हो ।
समितिले स्थानीयस्तरमा निर्माण गरिएका क्वारेन्टाइनलाई मापदण्डअनुसार बनाउन, आइसोलेसन बेड पर्याप्त मात्रामा निर्माण गर्न, किसानलाई मल तथा बीउबिजन उपलब्ध गराउन र उत्पादित वस्तु बजार सम्म पु¥याउने वातावरण सहज बनाउनसमेत सरकारलाई निर्देशन दिएको छ, सीहाईएनमा खबर छ ।
समितिले विदेशमा अलपत्र परेका कामदार र भारतसँगको सीमावर्ती क्षेत्रमा बसेका मानिसलाई सङ्क्रमण नियन्त्रणसम्बन्धी विश्वव्यापी मापदण्डअनुसार व्यवस्थित रुपमा घर फर्कने व्यवस्था मिलाउनसमेत निर्देशन दिएको छ ।
विदेशमा रहेका नेपालीको समस्या समाधानका लागि प्रधानमन्त्रीस्तरबाटै सम्बन्धित देशमा कुरा भइसकेको र कुनै समस्या भए सम्बन्धित देशले नै समाधान गर्ने उपप्रधानमन्त्री एवं कोरोना भाइरस नियन्त्रण तथा रोकथाम उच्चस्तरीय समन्वय समितिका संयोजक ईश्वर पोखरेलले बताउनुभयो ।
बैठकमा सहभागी गृहमन्त्री रामबहादुर थापाले भारतीय सीमा पारी करिब २१ सय नेपाली क्वारेन्टाइनमा रहेको जानकारी गराउनुभएको थियो । स्वास्थ्य तथा जनसङ्ख्या मन्त्री भानुभक्त ढकालले सरकारसँग उपलब्ध भएका परीक्षण किटको आधारमा कन्ट्याक्ट ट्रेसिङको मापदण्ड बनाई परीक्षण गरिएको बताउनुभयो । पछिल्लो केही दिन यता पीसीआर प्रविधिबाट गरिने परीक्षणलाई पनि बढाइएको मन्त्री ढकालले जानकारी दिनुभएको थियो ।
