कोरोनालाई जित्ने नेपालीको सङ्ख्या तिन पुग्यो, अर्का एक युवालाई पनि डिस्चार्ज गर्ने तयारी
६५ वर्षिय महिला नोबेल कोरोना भाइरस सङ्क्रमणको उपचारपछि निको भएर घर फर्किएसंगै कोरोनालाई जित्ने नेपालीको सङ्ख्या तिन पुगेको छ ।
धौलागिरी अस्पतालमा उपचाररत ६५ वर्षकी मनकुमारी पौडेल कोरोना निको पारेर शनिवार साँझ घर फर्कनुभएको हो । लगातार दुई पटकको जाँचमा कोरोना नभएको पाइएपछि उहाँलाई डिस्चार्ज गरिएको जिल्ला स्वास्थ्य कार्यालय बागलुङले जनाएको छ । मनकुमारीलाई चैत २० गते कोरोना सङ्क्रमण रहेको पुष्टि भएको थियो ।
यस्तै सहिद शुक्रराज ट्रपिकल तथा सरूवा रोग अस्पतालमा २७ दिनसम्मको उपचार पछि काठमाडौँकी प्रसिद्धि श्रेष्ठ पूर्ण रूपमा स्वस्थ भई शनिवार बिहान घर फर्कनु भएको छ । शनिवारको रिपोर्ट पनि नेगेटिभ आएपछि उहाँलाई डिस्चार्ज गरिएको अस्पतालले जनाएको छ ।
पौडेल र श्रेष्ठ गत चैत ४ गते फ्रान्सबाट कतारको दोहा हुँदै काठमाडौं आउपुग्नु भएको थियो । एउटै जहाजमा आएका अर्का युवतीको भने धौलागिरी अस्पतालमा नै उपचार भइरहेको छ । गत माघ ९ गते नेपालमा पहिलो कोरोना संक्रमित भेटिएका थिए । उनी पनि ठीक भएर घर फर्किसकेका छन् । शनिवार डिस्चार्ज हुने पौडेल र श्रेष्ठसंगै नेपालमा कोरोना सङ्क्रमण जित्ने नेपालीको सङ्ख्या ३ पुगेको छ । घर फर्किएकाहरुले आत्मबल, खानपान र सावधानीले कोरोनालाई जित्न सकिने प्रतिक्रिया दिएका छन् ।
यसैबीच दुईसाता अघि कोरोना देखिएर धनगढीको सेती प्रादेशिक अस्पतालमा आइसोलेसनमा रहेर उपचार गराइरहेका कैलालीको लम्की चुहा नगरपालिकाका एक युवाको पनि पीसीआर परिक्षण नतिजा नेगेटिभ अर्थात कोरोना नभएको पाइएको छ ।
सेती प्रादेशिक अस्पतालका अनुसार धनगढी कै प्रयोगशालामा शनिवार गरिएको दोस्रो परीक्षणको नतिजामा कोरोना नभएको पाइएको हो । अर्को पटक पनि ती युवामा कोरोना नभएको रिपोर्ट आएमा डिस्चार्ज गरिने अस्पतालले जनाएको छ ।
