अमेरिकामा मृत्यु हुनेको संख्या लगातार बृद्धी, एकै दिन ७७९ जनाको मृत्यु
कोभिड ९० को संक्रमणबाट अमेरिकाको हटस्पट न्यूयोर्कमा मृत्यु हुनेको संख्या लगातार बृद्धी हुँदै गईरहेको छ । हिजो बुधबार मात्रै एकै दिन ७७९ जनाको मृत्यु भएको छ ।
महामारी फैलिए यता न्यूयोर्कमा भाइरसका कारण एकै दिन संक्रमितको मृत्यु भएको यो अहिलेसम्मकै उच्च हो । मंगलबार न्यूयोर्कमा कोभिड–१९ बाट ७३१ जनाको मृत्यु भएको थियो ।
यस्तै न्यू जर्सीमा पनि बुधबार अहिलेसम्मकै धेरै व्यक्तिको मृत्यु भएको छ । न्यू जर्सीमा बुधबार २७५ जनाको मृत्यु भएको छ । मंगलबार राज्यमा २३२ जनाको मृत्यु भएको थियो ।
दुई राज्यमा गरेर अमेरिकामा कोरोना भाइरसका कारण मृत्यु भएका कुल मानिस मध्ये आधा भन्दा बढी छन् । न्यूयोर्क र न्यू जर्सीमा गरेर सात हजार ७७२ जनाको मृत्यु भएको छ । न्यूयोर्कमा ६ हजार २६८ तथा न्यू जर्सीमा एक हजार ५०४ जनाको मृत्यु भएको छ ।
अमेरिकामा अहिलेसम्म कोभिड–१९ बाट १४ हजार ७६६ जनाको मृत्यु भएको छ । अहिलेसम्म कुल संक्रमितको संख्या अमेरिकामा चार लाख ३० हजार ९०२ पुगेको छ । न्यूयोर्कमा संक्रमितको संख्या एक लाख ५१ हजार १७१ रहेको छ । न्यू जर्सीमा संक्रमितको संख्या ४७ हजार ४३७ पुगेको छ ।
विश्वभर कुल संक्रमितको संख्या १५ लाख १३ हजार भन्दा बढी रहेको छ । यस्तै मृत्यु हुनेको संख्या ८८ हजार ४०५ पुगेको छ । अहिलेसम्म तीन लाख २९ हजार ७३१ जना निको भएका छन् ।
स्पेनमा बुधबार एकै दिन ७४७ जनाको मृत्यु भएसँगै मृत्यु हुनेको संख्या १४ हजार ७९२ पुगेको छ । यस्तै इटालीमा बुधबार ५४२ जनाको मृत्यु भएसँगै कुल मृत्यु हुनेको संख्या १७ हजार ६६९ पुगेको छ ।
