नेपालबाट भारततर्फ लैजादै गरिएको २० हजार मास्क सहित दुईजना पक्राउ

नेपालबाट लुकाइछिपाई भारततर्फ लैजादै गरिएको २० हजार पिस मास्कसहित पर्साबाट दुईजना पक्राउ परेका छन्।

पक्राउ पर्नेमा पर्साको छिपहरमाई गाउँपालिका वडा नम्बर ५ बस्ने वर्ष ३८ का सुलिन जैसवाल र वर्ष २६ का अजय महतो कोइरी रहेका छन् । पक्राउ परेका दुबैले काठमाडौँबाट मास्क खरिद गरी बसमा लोड गरेर भारततर्फ लगिरहेको अवस्थामा पोखरिया नगरपालिका वडा नम्बर ४ बाट जिल्ला प्रहरी कार्यालय पर्साबाट खटिएको प्रहरी टोलीले पक्राउ गरेको हो ।

 पक्राउ परेका दुबै जनालाई हिरासतमा राखि आवश्यक अनुसन्धान भइरहेको पर्साकी प्रहरी उपरीक्षक गंगा पन्तले जानकारी गराउनुभयो । कोरोना भाइरस कोभिड १९ को बढ्दो सन्त्रासका कारण नेपालबाट मास्क खरिद गरी भारततर्फ लैजान लागिएको अवस्थामा उनीहरुलाई पक्राउ गरिएको थियो।