उखु किसानलाई सरकारद्धारा थप ४९ करोड ४९ लाख निकासा
उखु उत्पादक किसानलाई सरकारले दिने अनुदान वितरण गर्न अर्थ मन्त्रालयले थप ४९ करोड ४९ लाख ३४ हजार रुपैयाँ निकासा गरेको छ ।
विहिबार उखु खेती हुने जिल्लाको कोष तथा लेखा नियन्त्रक कार्यालयलाई उक्त रकम पठाइएको कृषि तथा पशुपन्छी विकास मन्त्रालयले जनाएको छ । कृषि तथा पशुपन्छी विकास मन्त्रालयका प्रवक्ता डा. हरिबहादुर केसीले अब स्थानीय तहले किसानलाई रकम वितरण गर्ने बताउनुभयो ।
किसानलाई प्रोत्साहन स्वरुप राज्यले दिने कुल अनुदान १ अर्ब ३३ करोड ५३ लाख १४ हजार रुपैयाँमध्ये ९२ करोड रुपैयाँ यसअघि नै निकासा भएको थियो । गत वर्ष २ करोड ४ लाख ५५ हजार क्विन्टल उखु क्रसिङ भएको कृषि तथा पशुपन्छी विकास मन्त्रालयको तथ्यांक छ ।
उखु किसानलाई अनुदान दिने सम्बन्धी कार्यविधी २०७५ अनुसार सरकारले उखु उत्पादक किसानलाई प्रतिक्विन्टल ६५ रुपैयाँ २८ पैसाका दरले अनुदान वितरण गर्ने व्यवस्था छ । तर सर्लाहीका उखु किसानले सरकारसँग भएको सम्झौता अनुसार उखुको भुक्तानी नपाएको बताएका छन् ।
पुस १८ गते आनदोलनरत उखु किसान र सरकारबीच माघ ७ गतेसम्म उखु किसानको सबै रकम भुक्तानी गरिसक्ने सम्झौता भएका थियो ।
सम्झौता अनुसार केहि किसानले भुक्तानी पाए पनि धेरै जसो किसानले भुक्तानी नपाएको सर्लाहीका उखु किसान राम विश्वास रायले बताउनुभयो । सरकारसँगको संझौता अनुसार बक्यौता रकम भुक्तानी नभए फेरि आन्दोलन गर्ने उखु किसानहरुले चेतावनी दिएका छन् । सीआईएन
