विकास खर्च गत वर्षको तुलनामा कम छैनः युवराज खतिवडा
अर्थ मन्त्री एंव सञ्चार तथा सूचना प्रविधि मन्त्री डा युवराज खतिवडाले विकास खर्च गत वर्षको तुलनामा कम नभएको बताउनु भएको छ ।
सञ्चार तथा सूचना प्रविधि मन्त्रालयमा आज मन्त्रीपरिषद्का निर्णय सार्वजनिक गर्न आयोजित पत्रकार सम्मेलनमा उहाँले समग्र मुलुकको एकीकृत वित्तिय विवरणले विकास खर्च राम्रो भएको देखाएको बताउनु भएको हो ।
आर्थिक वर्षको अन्त्यसम्ममा बजेटको ९० प्रतिशतभन्दा बढी खर्च हुने उहाँको दावी थियो । पूर्व सञ्चारमन्त्री गोकुल बास्कोटाको ७० करोड अनियमिततासम्बन्धी श्रव्य सामग्रीका बारेमा मन्त्री खतिवडाले सरोकारित र सम्बन्धित निकायले अध्ययन गरिरहेकाले उनीहरूबाट आउने नतिजा पर्खन आग्रह गर्नुभयो ।
राष्ट्रिय उद्योग र सेवा उद्योगलाई संरक्षण दिन सरकारले कर लगाएको उल्लेख गर्दै उहाँले पुस्तक बिक्रीमा धेरै मुलुकले मूल्य अभिवृद्धि कर लगाउने गरेको जानकारी गराउनुभयो, सीआईएन ।
त्यो कर १८ प्रतिशतसम्म रहेको उल्लेख गर्दे अरबौँ रुपैयाँ लगानी गरेर स्वदेशमा स्थापना भएका प्रेसले गर्ने कागज आयातमा पनि कर लगाएकाले पुस्तकमा लगाईएको कर जायज भएको मन्त्री खतिवडाको भनाइ छ ।
राष्ट्र बैँकको गर्भनर नियुक्तिमा भएको ढिलाई बारे सञ्चारकर्मीको जिज्ञासामा चैत ५ भन्दा अगाडि नै नियुक्त हुने उहाँले दावी गर्नुभयो । सरकारले दुईवटा केबलकार आयोजनालाई सामुदायिक वन तथा राष्ट्रिय वन क्षेत्रको जग्गा प्रयोग गर्न स्वीकृति दिएको पनि मन्त्री खतिवडाले जानकारी दिनुभयो ।
गत १२ गते बसेको मन्त्रिपरिषद् बैठकले नवलपुर जिल्लाको मौलाकालिका पुग्ने र रुपन्देहीको सिद्धार्थ केबलकार आयोजनालाई वन क्षेत्र प्रयोग गर्न स्वीकृति दिने निर्णय गरेको हो ।
