दुर्घटना गम्भिर घाइते भएका सीपी मैनालीलाई उपचारको लागि काठमाडौं लगियो
पूर्व उपप्रधानमन्त्री तथा नेकपा मालेका महासचिव सीपी मैनाली चढेको कार दुर्घटना हुँदा मैनाली गम्भिर घाइते हुनु भएको छ ।
मैनाली र उहाँका परिवारका सदस्य चढेको कार आज दिउँसो महोत्तरीको बर्दीवास नगरपालिका ३ कालापानीमा दुर्घटना भएको हो ।
मैनालीलाई उपचारका लागि हेलिकप्टर मार्फत काठमाण्डौ लगिएको छ । झापाबाट काठमाण्डौ जाने क्रममा बा ७ च २१२० नम्बरको कार विपरीत दिशाबाट आएको ना ४ च ७६६८ नम्बरको भ्यानसँग ठोक्किएको थियो ।
कारमा मैनालीका छोरा सरोज मैनाली, बुहारी पूजा ढुंगाना मैनाली, नाति पी एन् मैनाली र कार चालक रामप्रसाद पौड्याल रहेको प्रहरीले जनाएको छ ।
प्रहरीका अनुसार दुर्घटनामा सीपी मैनालीको खुट्टा, निधार र अनुहारमा गम्भीर चोट लागेको छ । बुहारी पूजाको दुवै खुट्टा भाँचिएको छ भने अरु सामान्य घाइते भएका छन्। मैनाली बाहेक अन्य घाइतेहरूको बर्दिवास जनसेवा हस्पिटलमा प्राथमिक उपचार भइरहेको छ ।
