प्रदेश तीनको राजधानी ‘हेटौडा’ र नाम ‘वाग्मती’ राख्ने औपचारिक निर्णय पुस २१ गते हुने
प्रदेश तीन सरकारको मन्त्रीपरिषद बैठकले तीन महिनादेखि बस्न नसकेको प्रदेशसभा बैठक यही पुस २१ गते आह्वान गर्न तयारी थालेको छ ।
स्थायी राजधानी र नामको टुंगो नलागेसम्म सभा सञ्चालनको निर्णय नगरेको सरकारले नेकपा सचिवालयले हेटौंडा स्थायी राजधानी र नाम वागमती निर्णय गरेको भोलिपल्टै आज सभाको बैठक आह्वान गर्ने तयारी थालेको हो ।
पार्टी हाइकमाण्डले राजधानी र नाम टुंगो लगाएपछि आज साँझ मन्त्रीपरिषद बैठक बसी यही पुस २१ गते प्रदेश सभाको बैठक आह्वान गर्न प्रदेश प्रमुखलाई सिफारिस गर्ने निर्णग गरेको हो ।
प्रदेश प्रमुखलाई बैठक आव्हानका लागि सिफारिस गर्ने निर्णय गरेर पठाईको प्रदेश सरकारका आर्थिक मामिलामन्त्री तथा प्रवक्ता कैलाशप्रसाद ढुङ्गेलले जानकारी दिनुभयो । प्रदेश सभाको बैठकमा प्रदेशको राजधानी र नामाकरणको विषय औपचारिक रुपमा टुङ्ग्याउनु पर्नेछ ।
आज साँझ काठमाडौंबाट फर्किनु भएका मुख्यमन्त्री डोरमणि पौडेलले मन्त्रीपरिषद् बैठक बोलाउनु भएको थियो । मुख्यमन्त्रीले सचिवालयले राजधानी र नाममा निर्णय गरेपछि एकसातामा प्रदेशसभा बैठकबाट पारित गर्ने यसअघि नै बताइसक्नु भएको थियो ।
दुईवर्ष देखि निर्णय हुन नसकेको प्रदेशको नाम र राजधानी अबको वैठकले टुंगो लगाउने विश्वास गरिएको छ । मन्त्रीपरिषद् बैठकले प्रदेश प्रमुखलाई सभाको बैठक बोलाउन सिफारिस गरेपछि प्रदेश प्रमुखले सभा आह्वान गर्ने कानूनी व्यावस्था छ ।
नेकपाको केन्द्रीय सचिवालय बैठकले गरेको निर्णयलाई प्रदेश सभाले अनुमोदन गर्ने निश्चित छ ।
प्रदेश सभामा कुल ११० सांसद मध्ये नेकपाको ८० मत छ भने कांग्रेसको २२ र अन्य दलको आठ मत रहेको छ । प्रदेशको स्थायी राजधानीका लागि दुई तिहाई अर्थात ७४ मत भए पुग्छ । बाइलाइन नेपालको सहयोगमा ।
