मकवानपुर सहित ५७ जिल्लामा चुच्चे ओखर खेतिको राम्रो सम्भावना
मकवानपुर सहित मध्य पहाडका ५७ जिल्लामा चुच्चे ओखरको खेतिको राम्रो सम्भावना रहेको कृषि विज्ञहरुले बताएका छन् ।
नेपालमा पछिल्लो ५० वर्षदेखि चुच्चे ओखरको पनि खेति भईरहेको छ । युरोपमा मात्रै खेति हुने चुच्चे ओखर दक्षिण एसियामा भने नेपाल र भारतमा राम्रो सम्भावना रहेको राष्ट्रिय फलफूल विकास केन्द्रका बागबानी अधिकृत धनबहादुर थापाले बताउनुभयो ।
चुच्चे ओखर खेतिका लागि मध्य पहाडका ५७ जिल्लामा उपयुक्त हावापानी रहेको र मध्य र उच्च पहाडका होचा पहाडहरु जहाँपनि यसको खेति गर्न सकिने थापाले जानकारी दिनुभयो । मकवानपुर, चितवन, कैलाली लगाएतका पहाडी भेगमा यसको खेति हुने उहाँको भनाई छ ।
नेपालमा चुच्चे ओखरको मूल्य प्रतिकेजी दुई हजारदेखि २५ सय
चुच्चे ओखर हेर्दा साधारण ओखर जस्तै देखिए पनि हातले नै फुटाउन सकिन्छ । नेपालमा यसको मूल्य प्रतिकेजी दुई हजारदेखि २५ सयमा बिक्रि भईरहेको छ ।
चुच्चे ओखरले रोपेको ७ देखि ८ वर्षपछि फल दिन थाल्छ । एक पटक रोपेपछि ५० वर्ष भन्दा बढि समय फल दिने चुच्चे ओखर एक रोपनी जमिनमा १० बोट लगाउन सकिने र एक हजार केजिसम्म उत्पादन गर्न सकिने हुन्छ ।
चुच्चे ओखरको विरुवा प्रतिगोटा ४० का दरले किर्तिपुरको राष्ट्रिय फलफूल विकास केन्द्रमा पाइन्छ । आफ्नो स्थानीय तहको सिफारिस लिएर विरुवाको लागि माग गर्न सकिने केन्द्रले जनाएको छ । पुस र माघमा मात्रै चुच्चे ओखरको बिरुवा रोप्न सकिने कृषिविज्ञहरु बताउँछन् । सीआईएन
