डेंगुबाट देशभर ६ हजार व्यक्ति संक्रमित
डेंगुबाट देशभर ६ हजार व्यक्ति संक्रमित भएको तथ्याङ्कले देखाएको छ ।
यो वर्ष धरानमा पहिलो पटक देखिएको डेंगुको संक्रमणबाट अहिलेसम्म ६ हजार व्यक्ति संक्रमित भएको तथ्याङ्कमा उल्लेख छ ।
साउन १ गतेदेखि भदौ २२ गतेसम्मको तथ्याङ्क अनुसार सबैभन्दा बढी प्रदेश ३ मा २ हजार १० जनामा डेंगुको संक्रमण भेटिएको छ ।
यस्तै गण्डकी प्रदेशमा ८९६, प्रदेश १ मा ८३१, प्रदेश ५ मा ९७, प्रदेश २ मा ३९, सुदुरपश्चिम प्रदेशमा २३ र कर्णाली प्रदेशमा ३ जनामा डेंगुको संक्रमण भेटिएको छ ।
डेंगु फैलिएसँगै सामान्य ज्वरोका विरामी पनि डेंगुको आशंकामा अस्पताल पुग्ने क्रम बढेको छ । शुक्रराज ट्रपिकल तथा सरुवारोग अस्पतालमा मात्रै डेंगुको परिक्षण लागि मात्रै दैनिक सात सय भन्दा धेरै विरामी पुग्ने गरेको अस्पतालले जनाएको छ ।
जुनसुकै रोगको विरामी पनि ड्ेंगु परीक्षण गर्न अस्पताल पुग्दा अस्पतालमा बेडको अभाव भएको र विरामीहरुलाई समस्या हुने गरेको अस्पतालले जनाएको छ । विरामीको चाप र बेडको अभावका कारण कतिपय विरामीलाई भुँईमै सुताएर उपचार गरिएको छ ।
गत सोमबार मात्रै अस्पतालमा आएका ४ सय ४७ जना मध्य ३ सय ११ जनामा डेंगुको संक्रमण देखिएको थियो । तर डेंगु लाग्दैमा विरामीको मृत्यु नहुने भएकाले डर भन्दा पनि सावधानी अपनाउनु पर्ने अस्पतालका प्रवक्ता डाक्टर अनुप बास्तोलाले जानकारी दिनुभयो ।
डेंगु जुनसुकै लामखुट्टेको टोकाईबाट नलाग्ने भएकाले डराउन नहुने तर सावधानी भने अपनाउनु पर्ने चिकित्सकहरुको भनाई छ ।
चिकित्सकहरुका अनुसार डेंगुको संक्रमण ज्वरो जस्तै सामान्य हो । तर लामखुट्टेको टोकाईबाट बच्न र डेंगु लागेको शंका लागे अस्पताल जान चिकित्सकहरुको सुझाब छ ।
