बाढी पहिरोको विपदमा परि अहिलेसम्म देशभर १११ जनाको मृत्यु
मनसुनपछिको विपदका कारण मुलुकभर एक सय ११ जनाको मृत्यु भएको छ ।
गृहमन्त्रालयको राष्ट्रिय आपतकालीन कार्य सञ्चालन केन्द्रले सार्वजनिक गरेको विवरणअनुसार विपदमा परेर ४० जना बेपत्ता भएका छन् भने ६७ घाइते भएका छन् । मृत्यु हुनेमा सबैभन्दा बढी गुल्मीमा १३ जना रहेका छन् ।
यस्तै बाढीबाट रौतहटमा १० जनाको मृत्यु भएको केन्द्रका प्रमुख वेदनिधि खनालले जानकारी दिनुभयो । उहाँका अनुसार अहिलेसम्म सबैभन्दा बढि बाढीबाट ५८ जनाको मृत्यु भएको छ ।
पहिरोबाट ४५ र भारी वर्षाका कारण आठ जनाको मृत्यु भएको छ । बाढीबाट एक सय २८ घटना भयो भने पहिरोका २ सय ८ घटना भएको केन्द्रले जनाएको छ ।
बाढीबाट ३१ जना तथा पहिरोमा परेर नौ जना बेपत्ता भएका छन् । अहिलेसम्म बाढीबाट एक अर्बभन्दा बढीको क्षति भएको छ ।
यस्तै पहिरोबाट दुई करोडभन्दा बढीको क्षति भएको छ । बाढी, पहिरो र डुवानबाट ६४ जिल्ला प्रभावित भएको छ ।
