मकवानपुरमा २ सय विपन्न परिवारका जस्तापाता सहितकाे घर बनाईने
नेपाल सरकारको सुरक्षित आवास कार्यक्रम अन्तर्गत मकवानपुर जिल्लामा चारवटा गाउपालिकाका विपन्न तथा गरिब परिवारका दुई सय घरको छाना जस्तापाताबाट बनाइने भएको छ ।
अाज जिल्ला समन्वय समिति मकवानपुरमा बसेको सुरक्षित नागरिक आवास समन्वय समितिको बैठकले हेटौँडा उपमहानगरपालिका तथा मनहरि, कैलाश र मकवानपुरगढी गाउँपालिकामा ५० का दरले खरको छानोका स्थानमा जस्तापाताका घर बनाउने निर्णय गरेकाे हाे ।
संघीय सरकारको सघन शहरी तथा भवन निर्माण योजनाअन्तर्गत सुरक्षित नागरिक आवास कार्यक्रममार्फत मकवानपुरमा निर्वाचन क्षेत्र नं २ मा खरले छाएको घरलाई पक्की जस्ताको घर बनाइने जिल्ला समन्वय समितिका प्रमुख रघुनाथ खुलालले बताउनुभयाे ।
नागरिक सुरक्षित आवास कार्यकमअन्तर्गत आव २०७५/७६ को स्वीकृत कार्यक्रमानुसार हेटौँडा–१९ मा ४० घरको छानो फेरिएको छ । बाँकी १० घरका छानो तथा अन्य गाउँपालिकाको छनोट गरी बैठकबाट अनुमोदनसमेत भएको छ । बैठकबाट अनुमोदन भएका लाभग्राहीलाई सम्बन्धित पालिकासँग सम्झौता गरी निर्माण अगाडि बढाइने निर्णय भएको आयोजना प्रमुख प्रकाश अर्यालले जानकारी दिनुभयाे ।
बैठकमा खुलालले गरीबी निवारणका लागि सुरक्षित आवास आवश्यक रहेको बताउँदै यस कार्यमा सबैले सहयोग गर्नुपर्नेमा जोड दिनुभयाे ।
