त्रिवेणीधाममा लाग्ने कुष्माण्ड नवमी मेलाको तयारी पुरा (तस्विरहरु)
मकवानपुरको धार्मिक तथा पर्यटकीय क्षेत्रका रुपमा विकास भइरहेको हेटौंडाको कुष्माण्ड सरोवर त्रिवेणीधाममा हरेक वर्ष जस्तै यसवर्ष पनि कुष्माण्ड नवमी मेला लाग्दैछ ।
कुष्माण्ड नवमी यषवर्ष कार्तिक २० गते अर्थात भोली बुधबार परेको छ । यस दिन कुबिन्डोमा सुनको प्रतिमा राखी दान गर्नाले भूमी दान गरे बराबरको पुण्य मिल्ने कुष्माण्ड सरोवर त्रिवेणीधाम विकास समिति अध्यक्ष ईश्वरीप्रसाद न्यौपानेले जानकारी दिनुभएको छ ।
परापूर्व कालमा देवता र राक्षस बीच युद्ध हुँदा राक्षस मारिएपनि उसको केशबाट कुबिण्डोको लहरा उत्पति भएको र त्यसैको फलका रुपमा कुबिण्डो फलेको पौराणिक कथन रहेको न्यौपानेले बताउनुभयो । त्यही कुबिण्डोमा सुनको प्रतिमा राखी भनवानलाई अर्पण गर्नाले सारा दुख कष्ट हटेर जाने धार्मिक विश्वास रहिआएको उहाँले सुनाउनुभयो ।
कुबिण्डो दान गर्न यसवर्ष पनि करीब १० हजारको संख्यामा भक्तजनहरु धाममा आउने अध्यक्ष न्यौपानेको विश्वास छ । भक्तालुहरुको सहजताका लागि समितिले द्वार निर्माण, कुबिण्डो दान गर्ने मण्डप निर्माण लगायत मन्दिर सरसफाइको काम सम्पन्न गरेको छ ।
कुष्माण्ड नवमी मेलामा १०८ धारामा स्नान, कुबिन्डो दान, हवन, भजन कीर्तन लगायतका कार्यहरु हुने न्यौपानेले जानकारी दिनुभयो । कुष्माण्ड नवमी मेलासंगै मकर मेला, एकादशी, साउने सोमबारहरुमा भक्तालुहरुको घुईचो लाग्ने गर्दछ ।
