एक वर्षमा काम सक्नुस् प्रदेश सरकारले पुरस्कृत गर्छः मुख्यमन्त्री पौडेल
प्रदेश तीनका मुख्यमन्त्री डोरमणि पौडेलले हेटौडा ६ चित्रेपानीमा बन्न लागेको बहुप्राविधिक महाविद्यालयमा प्रत्येक वर्ष २ हजार ५ सय प्राविधिक उत्पादन हुने विश्वास व्यक्त गर्नु भएको छ ।
नेपाल–भारत बहुप्राविधिक महाविद्यालयको आज शिलान्यास कार्यक्रमलाई सम्बोधन गर्दै मुख्यमन्त्री पौडेलले प्रविधिक शिक्षालाई महत्व दिनुपर्ने सरकारको नीति अनुसार नै काम गर्न लागिएको बताउँदै यस महाविद्यालयमा विभिन्न ४ प्राबिधिक विषयमा पढाई हुने जानकारी दिनुभयो ।
उहाँले समयमा काम हुन नसकेका कारण २२ वर्षदेखि अलपत्र परेको यो प्रोजेक्ट जती सक्दो चाँडो सक्न ठेकेदार कम्पनिलाई आग्रह समेत गर्नुभयो । उहाँले भन्नुभयो – 'निर्माण सम्पन्न गर्ने अवधी २ वर्षको छ, तर १ वर्षमा काम सकेर देखाउनुस् प्रदेश सरकाको तर्फबाट ठुलो पुरस्कार पाउनुहुनेछ ।'
मुख्यमन्त्री पौडेलले अब आफैले निर्माणको काममा निगरानी गर्ने समेत बताउनु भएको छ । उहाँले भन्नुभयो– 'काममा ढिला सुस्ती म आफै हुन दिन्न । बिहान, बेलुकोका समय मिलाएर निगरानी म आफै गर्छु ।'
गौरिटारको रंगशाला र यो महाबिद्यालय एकै पटक निर्माण गर्ने गरी काम गर्नु पर्ने मुख्यमन्त्री पौडेलले भनाइ छ । विसं २०५४ मा हेटौँडा नगरपालिकाका तत्कालीन नगरप्रमुख तथा वर्तमान मुख्यमन्त्री डोरमणि पौडेलको पहलमा निर्माण प्रक्रिया प्रारम्भ भएको २२ वर्षपछि बहुप्राविधिक महाविद्यालयको आज शिलान्यास भएको हो
