अब पुरुष मात्रै भएको मञ्च बहिस्कार
पुरुषमात्रै भएको मञ्च बहिस्कार गर्ने अभियान आजदेखि सुरु भएको छ ।
महिला अधिकारकर्मी, राजनीतिज्ञ, मानव अधिकारकर्मी, सामाजिक अभियन्ता लगायतका व्यक्तिहरुको उपस्थितीमा पुरुष मात्रै भएको मञ्च बहिस्कार गर्ने अभियान सुरु गरिएको हो ।
सीड कमिटीका उपाध्यक्ष बन्दना राणा मुख्य अभियन्ता रहेको अभियानको सुरुआत उपप्रधान तथा रक्षामन्त्री इश्वर पोखरेलले गर्नु भएको थियो । पोखरेलले अभियान पत्रमा हस्ताक्षर गर्दै ‘पुरुष मात्र हुने मञ्च बहिस्कार गरौं’ अभियानको सुरुआत गर्नु भएको हो ।
अभियानको उद्घाटन कार्यक्रममा बोल्दै उपप्रधान तथा रक्षामन्त्री इश्वर पोखरेलले कागजमा मात्रै नभइ मनदेखि अभियानको सुरुआत गरेको बताउनुभयो ।
उहाँले संविधानले नै महिलालाई पुरुष सरह सबै ठाउँमा सहभागिता हुने हक दिएको उल्लेख गर्दै हरेक मञ्चमा महिलाको सहभागिता आवश्यक रहेको पनि बताउनुभयो ।
कार्यक्रमको प्रमुख अतिथि समेत रहेका उपप्रधानमन्त्री पोखरेलले भन्नुभयो, ‘म आफू जाने कार्यक्रममा पनि महिलाको उपस्थितीबारे प्रश्न राख्छु । आफू मातहतका कार्यक्रममा पनि सहभागिता कार्यान्वयन गराउँछु ।’
कार्यक्रममा सहभागिले ‘पुरुष मात्र हुने मञ्च बहिस्कार गरौं’ भन्ने अभियानमा ऐक्यवद्धता जनाउँदै हस्ताक्षर समेत गरेका थिए ।महिलाखबरबाट
