बाल श्रमिक राखेको भेटे कारबाही हुन्छः प्रदेश तिनका मुख्यमन्त्री पौडेल
प्रदेश तीनका मुख्यमन्त्री डोरमणि पौडेलले तीन नम्बर प्रदेशमा बालबालिकालाई होटेलमा श्रमिकको रुपमा काम लगाइएको भेटिए कानुनी कारबाही गरिने बताउनुभएको छ ।
तीन नम्बर प्रदेशको सामाजिक विकास मन्त्रालयको आयोजनामा भएको प्रदेश सरकार र बालअधिकार संरक्षण अन्तरक्रिया कार्यक्रममा मुख्यमन्त्री पौडेलले हेटौंडा बालश्रमिकमुक्त र बालविवाहमुक्त बनाइने बताउनुभएको हो ।
मुख्यमन्त्री पौडेलले हेटौंडामा मानसिक सन्तुलन गुमाएकाहरुलाई सडकमा भेट्न नसकिने बताउनुभयो । उहाँले बालबालिकामाथि भएको हिंसा अन्त्य गर्दै बालश्रममुक्त क्षेत्र बनाउन आफूहरु लागि पर्ने बताउनुभयो । कार्यक्रमका तीन नम्बर प्रदेशका कारागार र बालसुधार गृहमा आश्रित बालबालिकाहरु अवस्था दयनिय देखिएको बताइएको छ । कारागार र बाल सुधार गृहमा रहेका १ सय ६१ जनाको अवस्था दयनिय रहेको पाइएको हो ।
सबैभन्दा बढी बाल सुधार गृह सानोथिमि भक्तपुरमा १ सय ४७ जना, काठमाडौंको कारागारमा ८ जना, धादिङ कारागारमा ३ जना, चितवन कारागारमा ३ जना बालबालिकाहरु रहेको पाइएको हो । आमाबाबुसँगै कारागारमा बस्न बाध्य बालबालिको अवस्था झन् जटिल रहेको बताइएको छ ।
तीन नम्बर प्रदेशका ११ वटा जिल्लामा सञ्चालित बालगृहहरुमा मात्र ११ हजर ८ सय ८२ जना बालबालिकाहरु बस्ने गरेका छन् । बनेका बालगृह पनि मापदण्ड विपरित रहेको बताइएको छ । तीन नम्बर प्रदेशका ११ वटा जिल्लामा ४ सय १५ वटा बालगृह रहेका छन् ।
