३३ किलो सुन प्रकरणः ३८ जनाको सम्पूर्ण सम्पत्ति रोक्का गरी अनुसन्धान सुरु
प्रहरीले ३३ किलो सुन काण्डमा संलग्न सनम शाक्यको हत्या आशंकामा ३८ जनाको सम्पूर्ण सम्पत्ति रोक्का गरी अनुसन्धान थालेको छ ।
अनुसन्धान तानिएका २१ जना भने फरार छन् । प्रहरीले हालसम्म १७ जना मात्र पक्राउ गर्न सफल भएको छ ।
उर्लावारीका शाक्यको हत्यापछि घटनाको अनुसन्धान गर्न गृह मन्त्रालयका सहसचिव इश्वर पौडेलको नेतृत्वमा एक टोली गठन गरिएको छ । पौडेलको टोली पूर्व गएपछि ३८ जनाको सम्पत्ति रोक्का गरी उनीहरुमाथि अनुसन्धान थालेको उच्च प्रहरी स्रोतले जनाएको छ ।
प्रहरीले अनुसन्धानका लागि भन्दै चैत २६ गते ३८ जनाको सबै कारोवार रोक्का गर्न आदेश माग गरेअनुरुप अदालतले सबैको बैक खाता, जग्गा लगायत सम्पत्ति रोक्का गर्न अनुमति दिएको हो । गत चैत २६ गते मोरङबाट पक्राउ परेका १७ जनालाई थप अनुसन्धान गर्न म्याद थपिएको छ ।
फरार सूचिमा ३३ किलो सुन आयात र समन शाक्य हत्या प्रकरणमा नाइके भनिएका चुणामणी उप्रेती ‘गोरे’ पनि छन् । शाक्यको हत्यापछि खुलेको ३३ किलो सुन काण्डमा प्रहरीकै संलग्नता भएको आशंकामा गृहमन्त्रालयले छानविन समिति बनाएको हो ।
तस्करी गरी ल्याएको सुन बाटोबाटै हराएपछि तस्करहरुले खोजीका लागि यातना दिने क्रममा भरिया सनम शाक्यको मृत्यु भएको आशंका छ ।
