हेटौंडा–काठमाडौँ जोड्ने छोटो दूरीका सबै मार्ग पुनः सञ्चालन
शुक्रबार दिउँसोको वर्षासँगै आएको पहिरोका कारण अवरुद्ध बनेको हेटौंडा–काठमाडौँ जोड्ने छोटो दूरीका सबै मार्ग पुनः सञ्चालनमा आएका छन् ।
भीमफेदी गाउँपालिका–१ बागझोरामा ठूलो पहिरो खसेपछि अवरुद्ध बनेको हेटौंडा–काठमाडौँ जोड्ने भीमफेदी–कुलेखानी–फाखेल–काठमाडौँ सडकखण्ड तथा कुलेखानी–सिस्नेरी–काठमाडौँ सडकखण्ड करिब १४ घण्टापछि खुलेको हो । छोटो दूरीको प्रवेशद्वारमै पहिरोले बाटो अवरुद्ध बनाएपछि काठमाडौँ–हेटौंडा आवागमन पूर्णरूपमा रोकिएको थियो ।
बाटो सुचारु भएसँगै रोकिएका सवारीसाधनहरु गन्तव्यतर्फ लागेका छन् । अवरुद्ध सडक खुलाउन नेपाल प्रहरी, नेपाली सेना, हेटौंडा उपमहानगरपालिकाको नगर प्रहरी र सडक डिभिजन कार्यालयका टोली सहित स्काभेटरको प्रयोग गरेको थियो ।
त्यसैगरी, हेटौंडा–ललितपुर जोड्ने कान्ति लोकपथ पनि सुचारु भएको छ । मकवानपुरको लेनडाँडा र जितपुर भन्ज्याङ क्षेत्रमा खसेको पहिरो पन्छाएसँगै उक्त मार्ग पनि खुलेको मकवानपुरका प्रहरी प्रवक्ता श्यामु अर्यालले बताउनुभयो ।
