जमिन भासिएर हराएको गाडीको खोजीमा आएका भूगर्भविद्को टोली फर्कियो
हेटौंडा उपमहानगरपालिका–१६ मा जमिन भासिएर हराएको गाडीको खोजीमा संलग्न भूगर्भविद्को टोली प्रारम्भिक अनुसन्धानपछि फर्किएको छ ।
घटनास्थलमा भूगर्भीय जोखिम रहेकाले तत्काल थप अध्ययन गर्न नसकिएको टोलीले जनाएको छ । घटनास्थलको जमिन र त्यसवरपर अत्यधिक कमजोरी देखिएकाले थप अध्ययन तत्काल सम्भव नभएको भूगर्वविद् कृष्ण पाण्डेले बताउनुभयो । उहाँका अनुसार, जोखिमयुक्त क्षेत्र पहिचानका लागि घटनास्थलका १० स्थान सहित वरपरका ७ स्थानबाट नमूना संकलन गरिएको छ । त्यसबाट आएको नतिजा अनुसार मात्रै दोस्रो चरणको अनुसन्धान थालिने उहाँले बताउनुभयो ।
दुई दिनसम्म अप्रत्यक्ष प्रविधिको प्रयोग गरेर अध्ययन गर्दा भूगर्भीय तरलिकरणका कारण गाडी भासिएको बताइएको छ । जमिनमाथि माटो देखिएतापनि सतहमुनि फाइन स्यान्ड(मसिनो बालुवा) र दलदल परेको माटो रहेको भूगर्भविद् नारायण अधिकारीले बताउनुभयो । यस्तो अवस्थामा जमिन कम्पन वा धक्काको कारणले तरल जस्तो बन्ने हुँदा जमिनको सतहले भार सहन नसकी तौल धेरै भएका वस्तुहरू भासिने गर्दछन् ।
म्याग्नेटोमिटरको प्रयोगका आधारमा गाडी ६ मिटर गहिराइमा पुरिएको अनुमान गरिएको छ । सम्भावित जोखिमलाई मध्यनजर गर्दै हेटौंडा उपमहामनगरपालिकाले वरपर ५० मिटर क्षेत्रलाई सिल गर्नुका साथै सावधानी अपनाउन आग्रह गरेको छ । यस घटनाले संरचना निर्माण अघि भूगर्भीय परीक्षणको आवश्यकता देखाएको छ ।
विशेषगरी माछा पोखरी, कुलो, सिँचाइ प्रणाली र बोरिङ जस्ता संरचनाहरूका कारण जमिन थप कमजोर हुने भएकाले भूगर्भविद्हरूले अध्ययन अनिवार्य गरिनुपर्ने बताएका छन् । गतशुक्रबार साँझदेखि ना४ च ४८३३ नम्बरको डिआई पिकअप गाडी गाडी कच्चि सडकमा गुड्दा गुड्दै माटो भासिएर हराएको थियो । चालक र सहचालक भने समयमै गाडीबाट निस्किन सफल भएका थिए ।
