मकवानपुरमा एक वर्षमा १२५ जनाले आत्महत्या गरेको तथ्याङ्क
सबैभन्दा बढी ९० जनाले गरे झुन्डिएर आत्महत्या
मकवानपुरमा एक वर्षको अवधिमा १२५ जनाले आत्महत्या गरेका एक तथ्याङ्कले देखाएको छ ।
गत आर्थिक वर्ष २०७८र०७९ मा १२५ जनाले आत्महत्या गरेको जिल्ला प्रहरी कार्यालय मकवानपुरको तथ्याङ्कमा छ । ती मध्ये गत आर्थिक वर्षमा ९० जनाले झुन्डिएर आत्महत्या गरेका छन् । जसमा ७ जना बालिका, ४ जना बालक, ५४ जना पुरुष र २५ जना महिला रहेको प्रहरी कार्यालयले जनाएको छ ।
यस्तै, ३२ जनाले विष सेवन गरेर आत्महत्या गरेका छन् । जसमा १८ जना पुरुष, १२ जना महिला, एक जना बालक र एक जना बालिका रहेका छन् ।
यसैगरी पानीमा हाम फालेर एक जना पुरुष र एक जना महिलाले आत्महत्या गरेको जिल्ला प्रहरी कार्यालयको तथ्याङ्कमा उल्लेख छ । यस्तै, आगो लगाएर एक जना पुरुषले आत्महत्या गरेका छन् ।
