जबरजस्ती करणी आरोपमा बाराका एक जना पक्राउ
पर्सा । १९ वर्षिय युवतीलाई जबरजस्ती करणी गरेको आरोपमा प्रहरीले एक जनालाई पक्राउ गरेको छ । पक्राउ पर्नेमा बाराको कलैया उपमहानगरपालिका–२१ बस्ने ३८ वर्षिय जाहिर अन्सारी छन् ।
बारा घर भई उच्च शिक्षाको लागि बीरगञ्जमा डेरा लिई बस्दै आएकी ती युवतीलाई आफू अविवाहित रहेको भनी झुक्याएर प्रेम सम्बन्ध गाँसेको प्रहरीको भनाई छ । उनले विवाह गर्ने प्रलोभन देखाएर २ वर्षदेखि ती युवतीलाई पटकपटक करणी गर्नुका साथै मोबाइलबाट अश्लील फोटो र भिडियो खिचेको समेत प्रहरीको दाबी छ ।
गत असोज २७ गते राती युवती एक्लै भएको मौका छोपेर उनको डेराकोठामा गई अश्लील फोटो र भिडियो सार्वजनिक गरी भाइरल गरिदिने भनी डरत्रास देखाएर जबरजस्ती करणी गरेको भनी पिडितले बिहीबार जाहेरी दिएको हो । सोही जाहेरीको आधारमा जिल्ला प्रहरी कार्यालय, पर्साबाट खटिएको टोलीले सोही दिन अन्सारीलाई नियन्त्रणमा लिएको हो ।
उनलाई जबरजस्ती करणी सम्बन्धी कसूरमा पर्सा जिल्ला अदालतबाट ७ दिनको म्याद थप गरी अनुसन्धान भइरहेको प्रहरीले जनाएको छ ।
