वाइसिएलद्वारा ४० थान पोल चोरी गर्ने गिरोहलाई नियन्त्रणमा लिइ प्रहरीको जिम्मा

छहारी संवाददाता
१५ श्रावण २०७८, शुक्रबार २१:२३

नेपाल कम्युनिष्ट पार्टी माओवादीको भातृ संगठन वाइसियल नेपाल बागमती गाउँपालिकाले फलामको पोल चोरी निकासी गर्ने गिरोहलाई नियन्त्रणमा लिई प्रहरीलाई बुझाएको छ ।

बागमती गाउँपालिका – १ मा बन्दै गरेको सबस्टेसनबाट गएराती प्रति पोल ३५ हजार रुपैया बराबरको ४० थान पोल चोरी निकासी गरिरहेको अवस्थामा ७ जनालाई नियन्त्रणमा लिइएको वाइसियल बागमती गाउँपालिका अध्यक्ष बिर बहादुर थिङ जानकारी दिनुभयो ।

मे १ ख २५०३ नम्बरको ट्रकमा पोल चोरी निकासी हुँदैछ भन्ने विशेष सूचनाका आधारमा चेकजाँच गर्दा ७ जनालाई पक्राउ गरी तत्काल इलाका प्रहरी कार्यालय फापरवारीलाई बुझाइएको उहाँले बताउनुभयो । तस्करहरु १२ जना रहेको भएपनि ७ जनालाई मात्रै नियन्त्रणमा लिन सफल भएको र अन्य भने फरार भएको उहाँले बताउनुभयो ।

 

पक्राउ पर्नेमा बागमती गाउँपालिका ७ का सुरेश लामा र उमेश लामा, रौतहट चपुरका धन बहादुर लामा र देव पौडेल, संखुवासभाका हरी नेपाल, काभ्रेका जयराम सापकोटा र ट्रक चालक भक्तपुर मध्यपुर ठिमीका विवेक पोखरेल रहेका छन् । कार्की एण्ड कटरीया कन्स्ट्रक्सनका प्रमुख नवराज कार्कीको मुख्य योजनामा उनिहरुले उक्त पोल नुवाकोटको त्रिशुली नगरपालिको बट्टार लैजान लागेको अनुसन्धानका क्रममा खुल्न आएको छ ।

यसअघि पनि चिरान काठ चोरी निकासी गर्ने समूहलाई नियन्त्रणमा लिई प्रहरीलाई जिम्मा लगाइएको भएपनि अनुसन्धान फितलो भएकाले पत्रकार सम्मेलन आयोजना गरी जानकारी दिइएको थिङले बताउनुभयो ।

सिन्धुली र बागमती गाउँपालिकाको सिमानामा रहेको २७ ओठा पोल तथा बागमती गाउापालिका ७ बाट ५० केबियको ट्रास्फरमर यसअघि नै गायब भएको उहाँले बताउनुभयो । पत्रकार सम्मेलनमा वाइसियल बागमती गाउँपालिका अध्यक्ष बिर बहादुर थिङ, वाइसियल मकवानपुरका अध्यक्ष राज कुमार मोक्तान, वाइसीएल जिल्ला इन्चार्ज सुमन पाख्रिन लगायतको उपस्थिती रहेको थियो ।

यसमा तपाइको मत

Your email address will not be published. Required fields are marked *


*