प्रचण्ड खिएर सकिन लागेको प्रधानमन्त्री ओलीको टिप्पणी
प्रधानमन्त्री केपी शर्मा ओलीले पुष्पकमल दाहाल प्रचण्ड खिएर सकिन लागेको टिप्पणी गर्नु भएको छ ।
शनिबार नेकपा ओली समूहले विराटनगरमा आयोजना गरेको सभामा उहाँले प्रचण्डलाई अब काँध हाल्न नसकिने बताउनुभयो । प्रचण्डलाई राम–राम मात्र भन्न सकिने तर काँध हाल्न नसकिने उहाँको टिप्पणी थियो । प्रधानमन्त्री ओलीले वैद्य, डाक्टरले प्रचण्डलाई छोडेको भन्दै अब झाँक्रीले समेत बचाउन नसक्ने भनी व्यङग्य गर्नुभएको छ ।
यस्तै, प्रधानमन्त्री ओलीले उपराष्ट्रपति नन्दबहादुर पुनले संसद विघटनप्रति असन्तुष्टि व्यक्त गरेकामा आपत्ति जनाउनु भएको छ । विराटनगरमा आयोजित सभालाई सम्बोधन गर्दै उहाँले उपराष्ट्रपतिको काम सरकारविरुद्ध भाषण गर्दै हिँड्ने नभएको टिप्पणी गर्नुभयो ।
यसैबीच , प्रधानमन्त्री ओलीले संसद विघटन विरुद्धको मुद्दामा सर्वोच्चले अन्यथा फैसला नगर्नेमा आफु विश्वस्त रहेको बताउनु भएको छ । उहाँले सर्वोच्चले कसैको दबाबमा अन्यथा फैसलानगर्ने भन्दै अब चुनावतर्फ लाग्न कार्यकर्ताहरुलाई आग्रह गर्नुभएको छ ।
