भागरथीको बलात्कार पछि हत्या आरोपमा पक्राउ परेका व्यक्ति उनकै दाजु पर्ने दिनेश भट्ट
भागरथी भट्टको बलात्कार र हत्या आरोपमा पक्राउ परेका उनकै दाजु पर्ने दिनेश भट्टलाई प्रहरीले आज सार्वजनिक गर्देछ । भागरथीका सहपाठी पनि रहेका दाजु पर्ने दिनेशलाई घटनाको १३औँ दिन हिजो पक्राउ गर्न प्रहरी सफल भएको हो ।
दिउसो साँढे १२ बजे सार्वजनिक गर्न लागिएको सुदूरपश्चिम प्रहरी प्रवक्ता एसएसपी मुकेश कुमार सिंहले जानकारी दिनुभयो । यसअघि उनलाई पक्राउ नगरी प्रहरीले केही दिन निगरानीमा मात्र राखेको थियो । उनीविरुद्ध पर्याप्त प्रमाण भेटिएपछि पक्राउ गरिएको एसएसपी सिंहले बताउनुभयो ।
सुरुमा भागरथीलाई सानो भीरबाट लडाएर घाइते बनाई बलात्कार गरेको उनले प्रारम्भिक बयान दिएका छन् । विद्यालयबाट फर्किँदा बाटोमा बलात्कार तथा हत्या गरेको उनले स्विकारेका छन् भने भागरथीको बलात्कारसमेत भएको पोस्टमार्टम रिपोर्टले पुष्टि गरिसकेको छ । प्रहरी स्रोतका अनुसार पक्राउ परेका दिनेशसंग मिल्दो सबुत प्रहरीसंग छ ।
परिस्थितिजन्य प्रमाणले पनि उनको संलग्नता पुष्टि भएको प्रहरीको दाबी छ । यति जघन्य अपराधमा पक्राउ परेका आरोपीले बदला लिन यो घटना गराएको बयान दिएका छन् । आफन्त भएकाले पारिवारीक रिसइबीका कारण बलात्कार तथा हत्या गरेको देखिएको प्रहरीले बताएको छ ।
भागरथीको बलात्कारपछि हत्या भएको विरोधमा स्थानीय विद्यार्थीले गरेको प्रदर्शनमा समेत ती व्यत्तिः सहभागी हुँदै आएका थिए । स्थानीय सनातन धर्म माविमा कक्षा १२ मा पढ्ने भागरथी माघ २१ गते विद्यालयबाट फर्किँदा सम्पर्कविहीन भएकी थिइन् । अर्को दिन स्थानीय लवलेक जंगलमा उनको शव भेटिएको थियो ।
