मनहरीको हाँडीखोलामा पक्की पुलको शिलान्यास
मनहरी गाउँपालिका वडा नम्वर –३ स्थित हाँडीखोलामा निर्माण गर्न लागिएको पक्की पुलको बिहिबार बागमती प्रदेशका मुख्यमन्त्री डोरमणि पौडेलले शिलान्यास गर्नु भएको छ ।
शिलान्यास कार्यक्रमका प्रमुख अतिथि रहेका मुख्यमन्त्री पौडेलले मनहरी गाउँपालिकाले विकास निर्माणका कामलाई तीब्रता दिएकोमा खुशी व्यक्त गर्दै प्रदेश सरकारको तर्फबाट पनि आवश्यक सहयोग गर्ने बताउनुभयो । उहाँले पुल निर्माणको लागि चालु आर्थिक वर्ष ०७७र७८ मा १ करोड ५० लाख रुपैयाँ प्रदेश सरकारको तर्फबाट सहयोग उपलब्ध गराउने प्रतिवद्धतासमेत व्यक्त गर्नुभयो ।
कार्यक्रममा जिल्ला समन्वय समितिका प्रमुख रघुनाथ खुलालले पुल निर्माणको काम तोकिएको समयमै सम्पन्न गर्न मनहरी गाउँपालिकाका जनप्रतिनिधि, निर्माण व्यवसायी लगायत सम्बन्धित सबै पक्षलाई आग्रह गर्नुभयो ।
कार्यक्रममा गाउँपालिकाका अध्यक्ष एकराज उप्रेतीले चालु आर्थिक वर्षमा उक्त पुल निर्माणको लागि लागि ५ करोड ३५ लाख ५१ हजार ५२५ रुपैयाँ बजेट विनियोजन गरिएको र निर्माण व्यवसायीबाट पनि तोकिएको समय अगाबै पुल निर्माण सम्पन्न गरिसक्ने प्रतिवद्धता प्राप्त भएको जानकारी दिनुभयो ।
उहाँले विकास निर्माणका काममा सबै पक्षको सहयोग प्राप्त भए निर्माणको कामले तीब्रता पाउँने बताउँदै सबै पक्षबाट सहयोग र गल्ती कमजोरी भएको अवस्थामा सुझावरआलोचनाको अपेक्षा आफुले गरेको बताउनुभयो ।
भैरव नारायण गणेश जेभी नामक निर्माण व्यवसायी कम्पनीले २०७९ साल मंसिर १९ गतेभित्रमा ३५ मिटर लम्बाई र ७ मिटर चौडाईको पक्की पुल निर्माण सम्पन्न गर्ने गरी गाउँपालिकासँग ठेक्का सम्झौता गरेको छ ।
