वैशाख २६ र २७ गते प्रदेश राजधानी हेटौंडामा लोक भजन प्रतियोगिता हुने
राष्ट्रिय लोक भजन चुड्का संरक्षण प्रतिष्ठान, जिल्ला कार्यसमिति मकवानपुरले बागमती प्रदेश स्तरीय लोक भजन प्रतियोगिता आयोजना गर्ने भएको छ । वैशाख २६ र २७ गते प्रदेश राजधानी हेटौंडामा प्रदेशस्तरीय लोक भजन प्रतियोगिता आयोजना गर्न लागिएको सोमबार पत्रकार सम्मेलन मार्फत् जानकारी दिइएको हो ।
लोपोन्मुख अवस्थामा रहेका खैजडी, मुजुरा, कर्ताल,मृदङ लगायत मौलिक बाजाहरु प्रयोग गरि लोक भजन, चुट्का, ख्याली किर्तन, श्लोक र वालन विधामा प्रतियोगिता आयोजना गरिने प्रतिष्ठानका अध्यक्ष अनिता सुवेदीले जानकारी दिनुभयो । नेपाली मौलिक लोक भजन, नेपाली मौलिक लोक संस्कृति, परम्परा र पहिचानको संरक्षण तथा प्रवद्र्धनका निम्ति प्रतियोगिता आयोजना गरिएको उहाँले बताउनुभयो ।
उक्त अवसरमा लोक भजन क्षेत्र र लोक बाजा क्षेत्रमा लामो समयदेखि योगदान पुराउने व्यत्तित्वलाई सम्मान गर्नुका साथै अशक्त, असहाय र निमुखाको उत्थानका लागि कोष समेत स्थापना गरिने बताइएको छ । प्रतियोगिताको बागमती प्रदेशका संस्कृति तथा पर्यटनमन्त्री विमल ठकुरीले उद्घाटन गर्नुहुनेछ ।
प्रतियोगितामा विभिन्न जिल्लाका १० वटा भन्दा बढी लोक भजन समुहहरूले सहभागिता जनाउने आयोजकले जानकारी दिनएका छन् । प्रतियोगितामा पहिलो, दोस्रो र तेस्रो स्थान प्राप्त समूहलाई नगद रु तीस हजार, बीस हजार र दश हजार प्रदान गरिनेछ भने सान्त्वना स्थान हासिल गर्ने दुई वटा समूहले पाँच–पाँच हजार पुरस्कार प्राप्त गर्नेछन् ।
प्रतियोगिता सञ्चालनका लागि करिब २० लाख लाग्ने आयोजकको अनुमान रहेको छ । बागमती प्रदेशको संस्कृति तथा पर्यटन मन्त्रालय,मकवानपुरका १० वटै स्थानीय तह र हेटौंडा उपमहानगरपालिकाका ४, ५, १८ र १९ नम्बर वडाको समन्वयमा कार्यक्रम हुन लागेको हो । पत्रकार सम्मेलनमा प्रतिष्ठानका केन्द्रिय सदस्य नारायण रेग्मी, जिल्ला सचिव विदोद पुडासैनी लगायतको उपस्थिती थियो ।
यस्ता कार्यक्रमले युवापुस्तामा मौलिक संस्कृति प्रतिको रुचि जागृत गराउने आयोजकको विश्वास समेत रहेको छ ।
