मकवानपुरे १०१ (एक से एक) सहकारी अभियन्ता नामक पुस्तक विमोचन

छहारी संवाददाता
२५ फाल्गुन २०८०, शुक्रबार १७:२२

सहकारी संस्थाहरुमा आबद्ध महिलाको भोगाई समेटिएको मकवानपुरे १०१ (एक से एक) सहकारी अभियन्ता नामक पुस्तक विमोचन गरिएको छ । शुक्रबार अन्तराष्ट्रिय श्रमिक महिला दिवसको अवसर पारेर जिल्ला बचत तथा ऋण सहकारी संघ मकवानपुरले पुस्तक प्रकाशन गरेको हो ।

पुस्तक विमोचन गर्दै हेटौंडा उपमहानगरपालिकाका मेयर मिना कुमारी लामाले सहकारीले महिलाको जीवन परिवर्तनमा महत्वपूर्ण भूमिका निर्वाह गरेको बताउनुभयो । सहकारीमा आबद्ध भएर महिलाले सीप चेतनास्तर तथा आर्थिक क्षेत्रमा समेत अगाडी बढ्न सकेको उहाँको भनाई छ ।

महिलालाई अत्मनिर्भर बनाउन सहकारीले खेलेको भूमिकाको मेयर लामाले प्रशंसा व्यक्त गनुृभयो । पछिल्लो समय बचतकर्ताको विश्वास गुमाउँदै गईरहेको सन्दर्भलाई जोड्दै मेयर लामाले सदस्यहरूको विश्वासलाई कायम राख्ने गरी कार्य गर्न सहकारी संस्थाहलाई आग्रह गर्नुुभयो । हेटौंडा उपमहानगरभित्र रहेका ६ वटा सहकारी संस्थालाई कार्वाहीको तयारी गरिएको समेत उहाँले जानकारी दिनुभयो ।

बागमती प्रदेशको संस्कृति, पर्यटन तथा सहकारी मन्त्रालय र हेटौंडा उपमहानगरपालिकाको सहयोगमा प्रकाशित पुस्तकमा सहकारी अध्यक्ष, व्यवस्थापक र सहकारीकर्मी गरी ५० जनाको भोगाई तथा संघर्षलाई आत्मवृतान्त मार्फत समेटिएको छ । पुस्तकमाथि मकवानपुर बहुमुखी क्याम्पस समाजशास्त्र विभाग प्रमुख रामेश्वर बडाल र आँचल साहित्य कला पुञ्जकी अध्यक्ष भावना सापकोटाले विवेचना गर्नुभएको थियो ।

कार्यक्रममा बागमती प्रदेश सहकारी विकास बोर्डका अध्यक्ष नारायण प्रसाद देवकोटा, राष्ट्रिय सहकारी महासंघका सल्लाहकार बद्री प्रसाद लम्साल लगायतको आतिथ्यता थियो ।

यसमा तपाइको मत

Your email address will not be published. Required fields are marked *


*